.
جات السنه الجديده و دايم السنوات الجديده تكون فرصه للكثير بأنه يحاول يتغير للأفضل
مع اني اتخيل ان اي وقت ممكن ان الواحد يتغير او خل نسميها ارتقاء بالنفس
. لان التغير يتكون من ايجابي و سلبي
اليوم صار شي غريب و لي فتره افتقده الي هو اني اصحي قبل المنبة
و اليوم قمت و حسيتها بدايه حلوه و دافع جديد ,, اني أرجع و أسابقْ الساعه
ماعندي كثير اكتبه بس اليوم 1/1 رقم مميز لازم نستغله
وكل سنة و صديقتي نهى بألف خير الله يجعل عمرها كله خير و بركه و يكتب لها السعاده
.
.
اربع خطوط للشارع ثلاثة منها عشان تمشي قدام مع الإشارة ووحده للي يبي يلف من جنب ، طيب ليه ! دايم و في اغلب الاحيان الكل يبي يوقف بأول الصف و يجي يسد طريق اللفه ، الي هو المفروض يكون مسلك سهل و مافيه اي صعوبه لانه من الاساس لهذا الغرض !!
الهدف من الشارع الرابع تقليل الزحمه مهي مساحة فاضيه عشان تصير انت الاول ولا تقطع السير .
و ديني ودين الي يجي و يبي يدخل من بين السيارات وين جاي يا الحبيب و بعدين
فجأة صار حادث و يوقف الشارع كله و نتاخر و لازم ننتظر المرور =) و نتعذب بالحر
هذا غير الملاقيف الي يخففون السرعه عشان يشوفون السالفه و يصير حادث ثاني .
صراحه انا انسانه جدا مرتبه و منظمه عشان كـذا اتعذب نفسياً اذا تأخرت عن موعد
و ما اتوقع احد يحب التأخير .
طبعاً هالشي انا اشوفه كل يوم وانا رايحه العمل و يدي ع قلبي لاني احس بنصدم
الحل الوحيد لهذي المشكله الصبر و يمشي على النظام ، و ان حصل كل شخص بياخذ سندويشته و عصيره =) .
.
السبت برجع للدوام بعد اجازه طويله ، ما آكذب عليكم ان قعدة البيت اعجبتني
بس لو اقعد كمان زياده يمكن انهار لاني صراحه تعودت على جو الزحمه
اكثر شي اشتقت له النظام الي كان بحياتي ، كنت انسانه اقوم الصباح و انام بالليل
الحين حياتي معكوسه ليلي نهار و نهاري ليل ، وهذا شي ماتعودت عليه
قبل اجازتي كنت مكرسه حياتي للشغل و ابسوي كل شي بس الحين
ابشتغل باعتدال و بطريقه اذكى و ربي يقدرني على الاخلاص
و بترك لحياتي الشخصيه مكان كبير كمان كنت مطنشه نفسي شوي قبل =D
اشتقت للبنات بالدوام ;p
.
اجلت هالبلوق الي ان ينتهي العيد لاني ما كنت افكر بطريقه صحيحه
لان كان زحمه و معمعه و قلق شوي بس اني حجزت التاريخ ،و خليتها مستوده
فتحت صفحة الفيس بوك الصباح و قمت ارد ع الناس الي كتبولي
و حتى تويتر و بالبلاك بيري <٣ الله يسعدهم جميع يارب
فكرت بيني و بين نفسي اني لازم اعمل لنفسي قائمة و اشوف السنه الجاي
هل حققتها ولالا !! يارب قدرني على تحقيقها طبعاً هي ببالي بس لازم اسجلهم
منها ..
- اواصل ع المشي اليومي
- اغير طريقتي في العمل
- اطور من نفسي في بعض الاشياء المهمه
- اقرا اكثر
- اقوي علاقتي مع ربي
و في اشياء ثانيه بس بحتفظ فيها على الورقه =)
.
اليوم انتهيت من ترتيب دولابي و نسقته بطريقه جداً منظمه ، و الحمدلله الموضوع اخذ يومين تقريباً
انا كنت مره خايفه انه ياخذ اكثر ، اتذكر ايام كنت اروح ارجع القى امي يعطيها العافيه
نافظه دولابي و مطلعه الاول و التالي وبعد فترة اقولها وين البلوزه الفلانيه تقول مدري عاد بعدين اكتشف
انها مطلعتها للناس الي تحتاج ، يا ماما ما يجوز ترى اجرك يروح =\ ابدا انها هي الصح
مو هنا النقطه وانا ارتب لقيت ملابس لسى التاق عليها يا اني عصبت من نفسي
الي يضحك ان اختي وهي عندي جلست تتقضى للعيد من دولابي =|
فاكتشفت اني اول لمن كنت اشتري ابداً ما كنت افكر بس اشتري و خلاص
و فكرت لو في مكان اقدر ابيعهم فيه بنص السعر ، و بعدين جو ع بالي
الناس الي ماترضى تاخذ حسنات من غيرها و تبي تشتري اشياء لكن بسعر ارخص
ليه ماعندنا هالسوق الي الناس تبيع فيه اشيائها و بعدين ناس تجي تشتريه بسعر معقول
و مناسب لقدراتها الماديه .
احس هالشي جداً مفيد خاصه انها تعلم الناس تحصل على اشيائها بنفسها
و تفيد الناس الي ممكن في يوم من الايام تحتاج انها تبيع بعض ملابسها
مره تخيلت شكل المحل . ان ربي قدرني في يوم من الايام اني اسويه بسويه
.
.
شريت الماك وانا انسانه جداً سعيده
اول ما بديت استخدمه تذكرت تنبيهات الناس، و ان الماك معقد و التعامل معاه صعب
بس الحمدلله ربي مسهل علي كل شي و كثير ممكن يساعدوني في بداياتي
سبب استعجالي بشراءه كان انفجار لابي الاول بس ناويه اعمله صيانه
مهما كانت هذي عشره عمر و ممكن استفد منه في اشياء ثانيه
الي استفدته من التجربه ان في بعض الاحيان مهما خططنا لشيئ
ممكن يحصل علي غير المتوقع و ما يحتاج اننا ننصدم لآن هالشي
ممكن يكون لصالحنا .. و كنا نحتاج دفعه عشان نحصل عليه
.
.
اليوم وأنا رايحه الدوام بدون مبالغه كل اشارع نوقف عندها في حرمه تطلب فلوس
اتعاطف معاهم يمكن يعانو حالة صعبه بس برضو في جهات معينه ممكن تقصدها
ودي اعطيهم بس اعرف أن هذا الشيء خطاء لأني بكون من الناس الي يساعدوا
على تفشي هذي الظاهره , وانا صراحه ضدها , مافي احد ما يقدر يسوي شي
و القوه الي مخليتك توقفي بهالرحر ومخليه ولدك معاك , حاولي تدوري اي وظيفه
مو شرط وظيفه , في أماكن توفرلك الي تحتاجيه .
احس الموضوع صير طمع أكثر من انه حاجه
أنا من الأشخاص الي افضل اخلي الانسان يحس بقمه الشي الي حصل عليه
عشان يعرف يتصرف فيه صح و ما يضيعه بسهوله , مثل كثير من الناس الحين
يحصلو الي يبغوه بمجرد طلبه و ياخذوه ببساطه , و بسرعه يطير منهم
ولا كأن كان معاهم شي قيم كان من الممكن انه يغير حياتهم .
.
.
احب اقابل ناس ما شفتهم من زمان " الي احبهم طبعاً" و أتحمس كثير
لدرجه يمكن اسوي اشياء متهوره و أتهور و أهورهم معاي عشان يتم
وهذا الشي الي حاولنا نسويه انا و صديقتي , سوينا المستحيل عشان تجينا
زياره ع الدوام و بعدين ربي سهلها من دون ماندري , كذا مره نخطط
و بالنهايه يتم بدون تخطيط بس كذا وبس , انا سعيده
أول ما شفتها كانت دمعتي بتنزل لأنها مره وحشتني =") . بس مسكت نفسي
ما حبيت اخرب الجو ابد , خاصه أننا مسويتها مفجأه لباقي البنات
جابت لي هدايا جميلة و لباقي البنات بس هداياي احلى شي ;P
يا حبيلك يا رزان والله أنك مثل اختي الكبيره انتِ شي من الأشياء الكويسه
الي حصلت لحياتي <3
.
.
اليوم عرفت اني مو بس ما اتحمل المحاسبة
عرفت اني لمن اشتغل عليها اعصب و راسي يصدع
و تجيني حراره , و اقرف كل شي حولي و ابي اطق احد
رجعت البيت و نمت على طول , وكان المفروض اني اطلع امشي
مع امي , لكن للأسف سحبتها نومه و ماقمت إلا 8 ان شاء الله
بكره انتظم اكثر و بخلي نومي بالليل , اتوقع نومي بدا يخرب
و جدول حياتي يتلخبط لأني بحاجه ماسه الى اجازه
بحاول الاسبوع , الجاي اخذ اخر الاسبوع يومين عشان اصفهم مع الخميس و الجمعه
و احلى اجازة
.
.
واقفه قدام المرايه اسوي شعري ولا افرق القذله
ولا !!!!!! شيبه يا لهوي , درت على البيت كله عشان يشوفها
قطتها ويا رب ما يطلع غيرها , جاني شعور غريب ! اني عجزت
يا عالم بصير 24 في شهر 9 , العمر قاعد يمر وأنا احس اني ما سويت
شي مهم بحياتي , ودي اسوي شي مهم احس بقيمته حتى لو شي بسيط
ودي امسك ورقه و اكتب فيها سؤال : ايش قدمت لك هيام ؟
و اطبع منها كثير و اوزعها و اشوف ايش سويت للعالم
و اتأكد هل أنا سويت شي ولا لا !! لأن احياناً تعمل شي وانت ما تدري
انك تركت تأثير بشخص ما و يمكن يفدك لو عرفت
فيني شيبة !!! يا ويلي عجزت ؟
ولا لأني متوتره الله أعلم , يارب تكون اخر شيبة
.
.
افكر كثير و المشكله الحل عندي لكل ما ابغاه الى الان
في اشياء ودي اسويها قبل ماهو تطويل للشي بس احس افضل
الاقتناع بالشي لأن لو بديت بشي وانت مو مقتنع فيه
ماراح تستمر فيه , بس احياناً تحتاج انك تندفع ع الشي
صدعت =|
صراحه توني صاحيه من النوم و جاهزه بروح للدوام
بس مابعد تصير الساعه 7 عشان أطلع من البيت
و حسيت شي بخاطري ابغا اطلعه عشان ما اصير كأيبه
طول اليوم , احس هذا اغبي بلوق انكتب و راح ينكتب
.
.
ماعندي شي اكتبه بس بدينا اليوم شهر جديد
شهر راح يمضى من حياتنا , بتكون فيه ذكريات
يا سعيده يا مؤلمه , بالحالتين أكيد بتكون حلوه .
اليوم صارلي شي غريب , حسيت ان هاليوم مرّ على من قبل
و صديقتي فسرته لي , قالت لي ان النظر الي تشوفه العين
يروح للشق الايمين و هو الي فيه الذكريات فأنا يجيني كأنه ذكرى
مو شي قاعده اعيشه باللحظه , ان شاء الله اكون فهمت منها صح
عشان ما اكون قلت لكم المعلومه خطاء
بتأكد منها و بعدل البلوق ان احتاج تعديل
.
.
العلاقات مع الناس شي معقد جداً ترتاح لشخص لدرجه كبيره
ممكن تعتبره صديق لك , أنا اسميه صديق الغفله , لأنه فعلاً بغفله
لا تسلم اسرارك و كلامك لأي احد ولا تقول لكل شخص ترتاح
له كل شي , كون حاجز بسيط بينكم , لا تصير جلف و لا تصير خفيف
خل علاقتكم شي سطحي بسيط , الي ان تأمنه عطه سر بسيط تدرج
لا تندفع , يمكن تخرعه و يهج و ما يصدق على الله يفتك منك
كثير منا يتعرف على ناس نكون من احلى ما يكون شهر شهرين و بعدين
خلاص نصير نسلم على بعض صدفه , ليه ما نخلي الصدفه بدايه و بعدين التعمق
أنا انسانه انفتاحيه على العالم كلهم اعرف ناس و اسولف معاهم عادي جداً
و اكون لينه في التعامل , و في كل شي و اضحك و ننبسط و بعدين ننتقل
لمرحلة جديده , أنا الصداقه عندي شي معقد جداً , و نادر اصادق مو حذر زايد
بس أنا هذا طبعي .
أكثر صداقه افتخر فيها دائمه 9 سنوات والي الان
الله يتمم علينا الصداقه و المحبه و يخلينا لبعض
في ناس تستاهل الصداقه وفي ناس ما تستاهل
حتى الوقت الي ممكن تجلسه معاهم حرام والله
فكر قبل تكوين اي صداقه و يمكن تحسون وسوسه
لكن راقب تصرفاته مع الناس و بكذا تتجنبو مشاكل كثير
مو كل من جلست معاه و انبسطت معاه صديق
في فرق بين الصديق و المعارف الثانيه
تقسيمات الناس كيثره , حاول انك توزعهم صح
.
.
كتاب جديد جالسه اقراه او بدئت اقراه اليوم
صراحه شكله ممتع مره , مديرتي جابته لي
دايم مديرتنا تهتم فينا من ناحية تطوير الموظفين
و تركز على الطوير الذاتي و دايم تدفعنا ناخذ دورات .
الفتره الجاي بعد نهاية كل بلوق لي بكتب لكم تلخيص الي قريته من الكتاب
و ايش فادني , و يمكن يكون البلوق كامل عن الكتاب .
ان شاء الله ما أخذ وقت طويل وانا اقراه لاني اعرف نفسي
إذا ما خلصته بركنه ع جنب ولا بكمله =( .
.
.
كثير من الأيام نتكاسل أننا نصحى و نقوم للدوام أو للمدرسه
بس تدرون أن لو نغير الدافع اليومي الي نقوم عشانه بنحس
بنشاط اكثر .
كمثال , كل يوم اتعذب وانا اصحي اختي عشان تروح الجامعه
و دايم اصحيها بعد ما أنا اطلع من دورة المياه , عشان اعطيها فرصه
اليوم ما أمداني اطلع من الحمام إلا الاخت صاحية , ليه ! لأنها رايحه
بيت صديقتها الصباح مو رايحه الجامعه , فالهدف تغير و صحت بسرعه .
لو نجرب هذا الشي على العمل , مثلاً : يلا بقوم للدوام بسرعه اليوم عندنا ميتنق حلو
نفكر بشكل ايجابي , نغير الهدف اليومي
لأن لو ماتغير بعد فتره ممكن يكون سببنا تعاسه لنفسنا
.
.
في البدايه بقول , أنا انسانه سعيده بعملي و مرتاحه جداً ولله الحمد
و احس اني جالسه انتج , مو بس لأني اسوي شي احبه , لا .
لأن مديرتي انسانه رائعه و اسلوب تعاملها جميله معانا
تخليك تحس اممم ان المكان مكانك و انت مسؤول عنه كلياً
عن كل شي ممكن يصير فيه , كأنه بيتك تماماً . لو اجلس اتكلم لبكره ما بخلص
نفسياتنا كانت شوي تعبانه امس فقدنا انسانه جميله كانت معانا
فأخذتنا المديره و غيرنا جو و طلعنا تغدينا برى , يمكن شي بسيط
لكن فعلاً اثر علي انبسطنا و ضحكنا و غيرنا جو و رجعنا للشغل
جلسنا شوي , جهزنا شغل بكره و بعدين رجعنا بيوتنا .
لنا فترة طويله نحاول نسوي مثل هذي الحركه لكن دايم نأجلها
أو اننا نتكاسل , لكن امس على طول قررنا و طلعنا و عملنا .
احياناً القرارات السعيده تكون سبب سعاده و مصدر فرح لبعض الناس
في ناس تجلس و تفكر و تخطط سنه على اتفه الاشياء , لازم نحاول نتهور
احياناً .
.
.
ما أدري ايش الي جاني و جاوبت اليوم الصباح قبل الدوام على اسأله
جايتني من فتره ابداً ماهي قريب , اكتشفت ان الاجابه على الاسئله
لازم ما تكون فوريه , لأنك يمكن تكون انفعالي أول مره تقراها
عشان كذا نعطيها فرصه و بعدين نجاوب .
وإذا كنت اعرف الشخص , من الذوق اني اعطيه خبر اني راح اتأخر
وحتى لو ما كنت اعرفه , بطريقة ما احاول اوصله
و اقوله اني جاوبتها لمن أجاول =)
http://www.formspring.me/Hsh
.
.
كان ودي ابدا هذا الشهر اكتب بشكل يومي
لكن ما ادري ايش الي صار , بحاول اركز أكثر على الكتابه
تدرون معاد احب اجلس على النت وكذا , صاير ممل ومافي شي نسويه
يمكن هي العاب الفيس بوك الي تسلي بس , اممم اهم شي في شي
يغير روتين العمل و النوم ;P
اليوم صار شي بالدوام خلاني اضحك , و غريب
في عملاء يقطون معاك الميانه و بشكل فوري حتى
لو كنت تكلمهم لأول مره , هذا الشي شوي يفجع
و يخليك تتجمد و يمكن ماتعرف ايش تعلق , و المصيبه
ان مزحهم احياناً يكون ثقيل , الحمدلله ان بالي نوعاً ما عليهم
طويل , ولا كان الله العالم ايش بيصير
ما أقول ان هالناس قليلة ادب او شي , لا عادي جداً
بس تستغرب , ممكن لأنها تعاملت مع ناس كثيره
و بشكل كبير جداً فصار عندها كأنها تعرف كل الناس
و كلهم اصدقاء .
شي جميل و غريب
.
.
تخوفني لحظات الوداع , ارتبك ما اعرف ايش اقول ولا كيف اتصرف
يمكن لأني افكر فيها قبل حدوثها او اثناء التجهيز لها .
بس من فتره تعلمت ان لازم أودع الناس الي احبهم و حتى الذكريات
لأن لو ما سويت كذا , راح اندم طول حياتي و افكر لو انه صار او حدث
و تبقى لحظه الوداع الي ممكن تكون لحظه جميله و ذكرى رائعه
شي مؤلم , و صعب النسيان
.
.
احياناً ودي الوم ناس و اعاتبهم بس للأسف ما اقدر
مو ضعف مني لا ابداً , بس خوفاً على مشاعرهم
ما أحب ازعل ولا اضايق احد , وان سويت بكون وقتها
الانفجار الكبير , اعرف هذا الشي غلط و مو كويس
بس جالسه احاول اتعامل معاه و ان شاء الله اوصل لنقطه صح
.
.
لي فتره افكر و اتسأل , في احد يتابع مدونتي ؟
غير الاشخاص الي اعرفهم
بعدين اقول ما ادري توني مسويتها جديده ما اتوقع ان في احد
انتم هنا ؟
.
.
أحب اكون من الأشخاص الي يتركون بصمه في نفس الانسان الي اتعامل معاه
بصمه حلوه تخليه يتطلع للمستقبل بطريقه افضل , تخليه يحس بقيمتي و قيمة نفسه
يمكن ما أشوف هذا التأثير إلا بعد مده من الزمن , و يمكن ما اشوفه ولا اسمعه بالمره
لكن اتمنى اكون من هذا النوع , جميل جداً الشعور .
حصلت لي كذا مره و حسيت اني تركت بصمه و أثر على اشخاص معينين , كانت سعاده
لا توصف ولله الحمد , في ناس تعتبرني قدوه لها هذا شي جميل مره
في ناس بالحياه تحسسك أن لك قيمة كبيره بالنسبه لهم , خلينا نبقى عشانهم =)
.
.
اصعب شعور لمن تفقد شي تعزه مره و قريب منك
و الأصعب إذا كان غصب عنك و ما ودعته
ما اعرف اعبر عن مشاعر الحزن , بس انها فعلاً مؤلمه
يارب , ريح بالي و اجبر خاطري
.
.
يمكن تختار طريق خطاء , و تكتشف هذا الشيء متأخر
لكن مو معناته أنك ما أستفدت منه شي , العكس يمكن كان هو السبب الي خلاك
. تصحي و تعرف طريقك الصح و يكون فادك
ابداً معرفه انك خطاء بعد مرور وقت
مو شي يخوف او يدمر حياتك , كثير ناس برعوا بعمر كبير
. الحياة عباره عن تجارب نخوضها و في يوم من الايام راح تنتهي
خلونا نعمل لنترك بصمه كبيره عند البشر و تكون ذات لها تأثير إجابي
.
.
ما أحد يبقى على حاله كل شخص يتغير
يمكن تغير مؤقت بسبب عوامل خارجيه او داخليه
يمكن صدمه او زعل , من شخص معين .
التعميم ابداً ماهو من صالح اي شخص لأن فيه ظلم
و مافي احد يحب ينظلم ولا حتى يظلم , احسني تحمست شوي
أنا وحده ما أحب أحد يتغير اسلوب التعامل معاه
احاول اتجاهل هذا الشعور و أقدر الظروف بس يجي وقت
اسميه الانفجار , مو معناته اني بتهاوش معاه او بقوله كلام
اطلع من حياتهم و بكل هدوء , لأني احب اترك الذكرى الحلوه
و طبعاً امحيهم من حياتي
.
أنا ابداً ماني مدمنة قهوه ان كانت موجوده شربتها
بس احياناً تطق براسي و اجيب و اعمل لنفسي
اليوم وانا اشربها لاحظت ان طعمها يختلف معاي
بإختلاف المكان , حتى المقادير تختلف معاي شوي
و اخاف يطلع طعمها غير عن قهوة الدوام , لأن
احلى قهوه هي القهوة الي اشربها الصباح وقت الدوام
.
.
ابداً لا تتحسف ولا تندم على شي فاتك , او بدئت تخسره
ولا شي جاك و رفضته , او شيء تمنيته ولا صار , الحياة مليئه بالأشياء
و اعرف ان الشي الي راح , او ما تحقق , بيجي بداله شيء افضل منه
فلو كل انسان فكر ان
قمة التعاسة عنده , هي قمة السعادة عند بعض الناس
أو ان مشكلته ولا شيء بالنسب لمشاكلهم
يمكن هذا الشيء يخفف عنه , في مثل معروف على هذا الشي
لكني ناسيته مع انه في بالي , الي يتذكره يكتبه لي بالردود
ربي خلقنا لهدف في هذه الحياة , خلونا نركز عليه و ننسى الامور الجانبية الآخرى
بس مو معناته نتغاضا عنها او نهملها , بس نخلي التركيز الاكبر على الهدف الرئيسى
.
تصير لك مواقف بالحياة تصدمك , تتأثر لكن ترجع و تتمالك نفسك من جديد
لكن يجي موقف و يكسرك و يحطمك و معاد تقدر ترجع , اقلها بالوقت نفسه
تحتاج وقت طويل , يمكن سنوات عشان ترجع مثل أول و حتى لو رجعت
ماراح تبقى نفس ذاك الشخص , المرح السعيد الي ينشر السعادة للناس
لأنك شخص مكسور محطم حكمت عليك الدنيا بأنك تتحطم كذا و تتوقف
عن نشر السعاده و الفرحه , أكبر تأثير جانبي اتوقع حدوثه هو قساوة القلب
شيء جيد , لأننا نحتاجه هذي الأيام
.
.
يجي الصباح , نقوم نجلس شوي فجأه غابت الشمس
بعض الاحيان تكون جالس بدون هدف و تتضايق بآخر اليوم
أنك ما سويت شي مهم , بس أنا اقولك عادي الإنسان بحاجه لهذا اليوم
يمكن ما تتذكره ابد لأنه ما ترك بصمه كبيره بحياتك ,
لكن بيجي يوم و تحس فيه مره ثانيه
.
.
نرجع لورى و نلاحظ ان اغلب الاشياء الي حكمنا عليها
على انها بتكون سيئة تتحول لذكرى جميله و ممتعه
و ممكن تكون سبب سعادتنا الحاليه , عشان كذا لازم نعطي
كل شي شيء بالحياة فرصته , لأن الحياة اساساً عباره عن تجارب
.
.
تكون بحالك ولا تضايق احد و حتى لو ضايقت تعتذر منه
لكن في آشياء " ناس " عندهم هوس يحارشونك و يقطون عليك كلام
ما يدرون ان اي كلمه تكتب عليه سواء حسنات او سيئات
أو بالاصح هم يدرون بس يتجاهلون الموضوع
او انه يروح من بالهم , و ياخذون الشيء بدافع التسليه و المتعه
ودي افهم ايش المتعه بالموضوع بدافع الفضول فقط , ولا الله لا يحدنا
على متعة فيها مضايقه للآخرين .
.
.
تصادف ناس تخليك تغير وجهة نظرك من بعض أشخاص
و تخليك تشعر أن الإنسان الي كنت تفكره اسوء انسان بالعالم
يصير أحسن شخص , وهذا بسبب لقائك بشخص آخر آسوء من الأول
بمعني ثاني " يغطي على الاول بأسلوبه " . هذا شي كويس خاصه
إذا عرفت شلون تتعامل معاه وكيف تحسسه انه ما قدر يأثر فيك
لمن كنت ادرس و كانو يقولون لنا الدكتورات كلام , ما كنت افهم
لكن لمن جربته بالحياة الواقعيه قمت اتذكر كل كلمه كانو يقولونها
و عادي جداً عندي لو اقابلهم مره ثانيه و أتعامل معاهم , العكس ممكن اكون
مستعده لهم بشكل أكثر .
لله الحمد إكتشفت أني انسانه اعرف اتصرف من اصحاب الشخصيات الصعبة
اتذكر اني قد قريت كتاب بهذا العنوان . كنت لسى بالثانوي
اتوقع تأثيره بداء يظهر الحين , الكتاب جداً قديم كان من مكتبة جرير
والحمدلله آني اعيش مع ناس و مجتمع جميل , الله يحفظهم يارب
.
.
اليوم عرفت اني افرح من اقل هديه تجيني
مهما كانت بسيطه و حتى لو ما كانت حلوه
افرح لمجرد قلم رصاص عادي او حتى ورقه مكتوب عليها كلام حلو
اليوم احسه تضارب احاسيس .. سعاده .. نكد .. و احساس المظلوم
يارب ما اظلم أحد لأن شعور المظلوم .. جداً قبيح
الناس الي اسلوبها قبيح مع الناس , هذي شلون تفكر ..! كيف تحس ؟
يحسون بالقوه او شي؟ ولا يخفون في داخلهم شي آخر ؟
الله يعين و يخليلي الناس الي يحبوني و احبهم و يعذب اي شخص يقهرني
.
اتمنى هالشي ما يقلل من مستواي و يكون حافز لي
هذا البلوق كان لازم ينكتب امس بالليل لكني كتبت جزء و نمت
و الحين تشتت أفكاري نوعاً ما .. و أخاف اربط بين امس و اليوم
عشان كذا اكتفى بهذا القدر =)
